【明報專訊】新任勞工處長唐智強「坐低」一個月，面對唔少勞工議題，好似虐傭案、輸入外勞爭議等。唐處長噚日同一班傳媒行家見面，提到任內「三大挑戰」，首選係研究標準工時立法，事關呢個議題係由無到有，勞資雙方都有唔同意見；一眾行家亦好關心處長工作，佢就話自己鍾意「清晒枱面」，好似前日朝早8點幾開工，就做到噚日凌晨近3點先收工，足足有成19個鐘！ 第一關：研標準工時立法 自從1983年加入政府嘅唐智強，到任勞工處之前係香港駐美國總經濟貿易專員，又曾經做過食環署副署長同民政事務局副秘書長等，好熟悉政府部門運作。雖然去咗美國5年，但唐處長絕對無同香港嘅工作模式脫軌，提到自己每朝8點15分就返到辦公室，通常夜晚10點先放工，返屋企可以做到近3點先休息。 除咗標準工時嘅工作挑戰，唐處長話香港人力短缺、職安健問題都好需要關心，不但引起輸入外勞爭議，又認為職安健做得唔好，年輕人培訓完見到咁多意外都唔敢入行，所以一定要加強執法，唔排除引入建造業招聘中心，同埋透過科技改善職安健情况，例如喺安全帶安裝一套警報系統，若工人冇扣上會發出警報，甚至透過電子信號傳達到地盤嘅監控室。
|
| |
| |
