「溫水劇場」作者 封筆1小時復出

「溫水劇場」作者封筆1小時復出

[2014.09.06] 發表

【明報專訊】喺作品中經常用一隻人形青蛙諷刺時弊嘅「溫水劇場」漫畫作者「白水」，噚日喺facebook專頁刊登一篇「封筆啟事」，但1小時後就宣布「復出」。

原來有內地網站登咗篇有關白水嘅「起底」式文章，提到白水屋企情况，白水睇完就「巧驚驚」，引用早前《主場新聞》創辦人蔡東豪「我恐懼、我誤判、我愧疚」名句，宣布「封筆」，白水解釋本來只係打算「玩吓」、用荒謬方式表達不滿，「唔知搞到咁大件事」；又話本身畫漫畫都無乜特別主題，唔會因為呢件事「修正路線」。

不滿被起底 fb封筆宣言只係「玩吓」

白水曾經接受《明報》訪問，透露過家庭情况，但今次「起底」文章內容就有真有假。例如起底者話白水爸爸係日本人，當年拋低母子返日本，結果白水喺單親家庭長大。白水同Emily澄清，佢爸爸同自己都唔係日本人。佢又話，近日facebook帳戶畀人入侵，好彩畀facebook擋到，而白水做緊份工經常要出入大陸，所以都有啲擔心，但話口未完，白水就喺網上呼籲大家「一齊努力對抗共產黨」，仲上載一張題為《不犯法的不合作抗爭運動》新漫畫，果真夠勇。