【明報專訊】11月17日嘅世界盃外圍賽「港中大戰」波飛極速賣完，相信好多人都同Emily一樣，噚日對住部電腦撳咗個幾兩個鐘F5都係買唔到飛。港中大戰一票難求，球迷買唔到飛又想喺現場撐港隊，點算呢？有球迷就創意十足，教人爬上旺角大球場附近嘅樹上，居高臨下、一覽無遺喎。 爬樹三方案 徒手道具樣樣齊 呢位網民仲好認真，整咗個「旺角大球場爬樹技巧攻略」，提供咗3個方案，包括「徒手攀爬」、「搭建高台」同「使用機械升降台」，逐個方案分析，例如話徒手攀爬「只合適於身體健壯人士……可配合梯子進行，危險性極高」，而用機械升降台就「成本高昂，須由專人操控，非常不便」之類，仲提醒爬樹要有個人防護裝備、爬樹繩、安全短繩、活動鎖扣等。 網民講到似層層，搞到Emily都有啲心郁郁，唔知到時會唔會真係見到有班「泰山」喺樹上面睇波呢？
|
| |
| |
