【明報專訊】財爺曾俊華前日喺預算案引用蘇芮《憑著愛》嘅歌詞，話相信香港人幾時都可以喺困難中搵到出路。一向鍾意唱歌嘅民建聯蔣麗芸(Ann姐)噚日就有感而發，二次創作首歌嘅歌詞，一展歌喉之餘，仲整埋MV放上網。Ann姐認真製作究竟所謂何事呢？原來係想憑歌寄意，希望立法會停止拉布。 Ann姐喺MV引言話，聽到財爺嘅歌詞好感觸，之後就開金口，「曾踏遍，刺腳的彎路，誰料到，無人剪布」，又話自己怕咗拉布，「遇到幾多次點人，點到心驚震，但我深信終有一日，議事規則必會改」。MV配以人民力量陳偉業喺會議廳外慶祝流會、本土派團體示威、市民同警方衝突等畫面；唱到「憑著愛，情懷不老」，更加有Ann姐同民主黨何俊仁一齊嘅新聞片段。不過，其實片段背景係Ann姐想拉對方入會議廳開會。 唱到「憑著愛」見到何俊仁 去到結尾，Ann姐話「面對拉布點人，終會可衝破，無論點都艱苦等待，人生會正義必勝」，又以「惟望這小島的波折，盡快無」作結。呢個兩分鐘嘅MV絕無欺場，唔知大家又點評價呢？
|
| |
| |
