【明報專訊】領展今個月開始將長發街市外判建華接手管理，早前仲因為咁而引發商戶罷市7日反對「判上判」。而近日街市就張貼咗一張關於長發街市「休閒一日遊」嘅宣傳單張，原來活動係由建華主辦。曾參加罷市嘅長發街市商戶李錦源就話，事前未有聽過有關活動，認為建華只係想藉此「粉飾太平」。 睇番張宣傳單張，「休閒一日遊」一共有4個景點，包括參觀同樣係建華管理嘅良景市集，以及妙法寺同恆香製餅廠，仲會去流浮山食海鮮！當日朝早9點喺青衣美食城正門出發，去咁多地方，都係大小同價，收費120元。Emily想問建華回應，至截稿前未獲回覆。 遊良景市集食海鮮 每位120元 長發街市商戶李錦源就話，事前唔知道有關活動，建華都無通知佢哋，仲話「我哋都唔會參加」，佢又認為領展同建華咁做只係為咗「粉飾太平」，又話罷市後，建華都未有再同佢哋溝通，商戶𠵱家只可以等待對方通知，先知道有關租約會唔會再有變動。 另外，有網民發現領展以「領展資產管理有限公司」贊助新界青聯發展基金會，喺青衣舉辦「親子一天遊」，大人、小童都同價，17蚊就可以參加，網民認為領展做法都只係為咗改善形象，等街坊無咁關注街市外判嘅事。
|
| |
| |
