民建聯路向營談品格 曾鈺成引行李事件﹕無「小題」點「大做」？

民建聯路向營談品格曾鈺成引行李事件﹕無「小題」點「大做」？

[2016.04.11] 發表

【明報專訊】剛過去嘅周末民建聯喺深圳舉行路向營，有200幾人出席，分別邀請立法會主席曾鈺成、政務司長林鄭月娥、城市大學公共及社會行政學系教授葉健民，以及中聯辦法律部部長王振民演講。民建聯主席李慧琼同副主席張國鈞噚日開記者會總結路向營內容，其中提到立法會主席曾鈺成要求民建聯要有「反求諸己」嘅精神，又要喺理念、品格、知識、技巧、判斷力方面不斷鍛煉、有所提升。

聽落無乜特別，但Emily聽聞，其實曾主席談及品格時，係用特首梁振英近日被指喺機場涉嫌利用特權要求航空公司職員代阿女拎行李、特事特辦一事去做例子。有與會者同Emily講，曾主席覺得其實漏行李本係小事一件，但從政者應該要求自己有更高品格，直言梁振英唔應該同機場職員通話。曾主席繼而話，有人形容今次事件係「小題大做」，但事實係無小題，外界又點可以大做呢？

林鄭5個字心底話

至於林鄭月娥，有人就笑言林太疑似會上講冷笑話，話佢會上提到有5個字心底話想同大家講，呢5個字係「向民建聯學習」，唔通司長都好似新聞統籌專員馮煒光咁對數字有障礙？正當全場起哄時，林太就話其實自己未講完，5個字嘅心底話係「真誠為香港」。有與會者又引述，林太會上似乎好着緊強積金對冲機制等勞工議題，認為政府需要更積極有為、有角色，相信議題唔能夠單靠勞資雙方自己傾掂。

更多港聞