已做6年 梁栢賢續任醫管局總裁
[2016.07.29] 發表
【明報專訊】做咗6年醫管局行政總裁嘅梁栢賢(PY)，噚日再獲醫管局續約3年，11月8日起生效。𠵱加醫護人手不足、急症室排長龍，睇嚟PY任期內都要繼續拆彈先得喇！
醫院管理局主席梁智仁讚PY過去6年，帶領醫管局處理人手短缺等多項挑戰，其間推行退休後重聘計劃、海外招聘等，話會繼續支持PY。
同時，醫管局高層又嚟新一輪音樂椅，總行政經理(策略、服務規劃及知識管理)李夏茵將會喺11月起會接替羅思偉，出任策略發展總監；羅思偉就會接替退休嘅熊志添，做新界東醫院聯網總監。
至於預計今年底建成嘅天水圍醫院，就會同博愛醫院合併管理，本身係博愛醫院行政總監嘅楊諦岡，下月1日起會同時出任天水圍醫院行政總監。
更多港聞
第19屆校園記者﹕由石硤尾講到電話亭 校際專題賽結果公布
【明報專訊】為了讓更多校園記者以外的學生體會記者工作，除了上周公布結果的「校記專題報道比賽」，第19屆《明報》校園記者計劃亦舉辦「校際專題報... 詳情
相關新聞
