【明報專訊】港大民意研究計劃喺8月5日至11日，隨機訪問1004名市民，結果顯示特首梁振英(CY)嘅評分無大變化，較7月下旬微升0.7分，至40.8分(滿分100)，繼續低於45分警戒線；不過佢嘅民望淨值(支持率減反對率)就升5個百分比，至負39個百分比。 3名司長評分全面下跌，政務司長林鄭月娥評分微跌0.5分，至55.6分，民望淨值就上升1個百分比，至34個百分比。財政司長曾俊華評分跌1分，至63分，但仍然係評分最高嘅司長，民望淨值升1個百分比 ，至59個百分比。相比之下，律政司長袁國強評分跌幅較大，跌2.6分至46.1分，民望淨值更由正轉負， 跌6個百分比，至負1個百分比。 另外，CY噚日發表網誌，借中國成功發射量子科學實驗衛星「墨子號」，批評拉布。CY話，量子衛星嘅成功研發，說明科技日新月異，亦突顯國家喺科技領域嘅進步，而香港喺科技發展同應用上「不能再蹉跎」，由於立法會拉布，創科局成立被拖延3年幾，所以「我們要追回失去的時間」。
|
| |
| |
