【明報專訊】馬會公布2015至2016年度投注額有2027億港元，按年上升6%創新高，為政府庫房帶嚟209.1億元博彩稅同利得稅收入，納稅亦打破歷年紀錄。另外，馬會慈善及社區項目捐款亦刷新紀錄，達39億元，連同12.8億獎券基金撥款，馬會2015至16年度納稅連同捐款有260.9億元，較上年度上升4%。 六合彩投注扭跌勢增一成 逾2000億投注額之中，賽馬投注額上升1.8%，至1074億元；足球投注額868億元，增加10.9%，相信與歐洲國家盃賽事有關；六合彩方面，適逢今年3月係40周年，馬會推出1億元彩金，扭轉舊年嘅輕微跌勢，六合彩投注額上升9.9%至85.5億元。 馬會主席葉錫安話馬會捐款達39億元，較3年前增加1倍，打破歷年紀錄，而資助嘅慈善社區項目亦增至215個。佢喺主席報告又提到，馬會計劃未來幾年嘅慈善捐款額會維持現有水平。 馬會將繼續推動三大範疇慈善工作，包括青年、長者安老同普及體育。另外，馬會同政府合作保育同活化中區警署，其中已婚督察宿舍5月發生倒塌，葉錫安重申馬會將全力以赴完成項目。
|
| |
| |
;){kind=small}
