批生存空間窄 游蕙禎：青年無房做愛

[2016.10.05] 發表

【明報專訊】前日喺理工大學有個「香港2047議會抗爭與統獨之爭」論壇，請嚟4名立法會新丁交流，大家原本集中講論壇議題，臨近尾聲，出席者之一游蕙禎(圖)喺講緊社會空間不足時，突然爆咗句「就算我哋要扑嘢(做愛)，我哋都搵唔到房去扑」，令台下唔少觀眾嘩然。

Emily打電話畀游蕙禎問吓「扑嘢」論，佢助手就話佢唔方便，要遲吓先覆。

有人撐一語中的有人批不雅

游蕙禎原本講緊香港移民福利政策，話認為若果單程證審批機制一日唔取消，香港嘅福利都只會被外來移民壟斷。佢批評政府無幫過香港嘅年輕人，之後愈講愈激動，話大學畢業生做嘢之後要還貸款已經辛苦，仲連生存空間都不斷被縮窄，「就算我哋想要扑嘢，我哋都搵唔到房去扑」。

論壇喺大學校園舉行，但當時唔少聽眾都係婦女或非大專生，佢哋聽到之後都嘩咗一聲。事後唔少人喺網上討論，有人撐游蕙禎一語中的，亦有人批評佢用字唔文雅，有失議員身分。

噚日凌晨3點幾，游蕙禎就喺facebook打咗篇「點解後生仔連野(嘢)都冇得扑？」嘅論壇後記，入面無回應佢嘅「無房做愛」論，只係講年輕人搵工難、又負債，仲要「年青人就連扑野(嘢)的場所都買少見少，連扑野(嘢)都要排隊」，認為社會實况難以令人抱有憧憬。

更多港聞