官方宣誓相 議員變瞇眼

官方宣誓相議員變瞇眼

[2016.10.15] 發表

【明報專訊】立法會議員星期三宣誓，立法會秘書處當然有搵攝影師拍番官方相，仲放咗上網，睇得出一眾議員都好專心讀出誓詞。不過，部分人唔知係唔係得罪咗大會攝影師，立法會主席梁君彥、衛生服務界議員李國麟都好似「瞇埋眼」宣誓；新民黨女將容海恩就顯得有啲「惡死」，但容海恩就覺得張相影得唔差，但似乎影得佢太瘦，睇嚟要食多啲嘢增肥咁話。

容海恩話影得太瘦要增肥

官方宣誓相簿都有3個宣誓無效議員，包括青年新政梁頌恆、游蕙禎同獨立姚松炎嘅身影，游蕙禎張相就非常兇狠。Emily睇過今次輯官方宣誓相，發現有唔少議員可能太專心讀誓辭，好多人都變晒「低頭族」，經民聯林健鋒張相好似瞓着，佢見到自己幅相都猶豫咗一陣，然後話「無話滿唔滿意，係咁就係咁」，但佢又即刻向Emily展示非官方宣誓相，話比秘書處操刀嗰張更靚。

尹兆堅質疑唔揀醒神相

至於民主黨尹兆堅幅相一樣係「瞇埋眼、口噏噏」，佢話當時唔想變低頭族，已經刻意拎起張宣誓紙，「佢哋應該係連環快拍，點解唔揀張醒神少少？」又話宣誓係莊嚴儀式，無理由官方相唔係瞇埋眼就口擘擘咁樣衰。

熱血公民鄭松泰對自己幅相都話「滿意嘅」；問到相裏面嘅神態會唔會畀人感覺好囂？佢就話無所謂，「可能我本身個人係咁」。

更多港聞