張華峯梁頌恆互罵爆粗 楊岳橋坐低駁嘴 梁君彥叫坐低

張華峯梁頌恆互罵爆粗楊岳橋坐低駁嘴梁君彥叫坐低

[2016.11.03] 發表

【明報專訊】立法會混亂持續，建制派都難免抵唔住頸，噚日就出現青年新政梁頌恆、經民聯張華峯互罵「仆街」嘅場面。事緣開會期間梁頌恆同游蕙禎突然衝到主席台前自行宣誓，主席梁君彥隨即宣布暫停會議，混亂間梁頌恆、邵家臻及幾個保安就喺坐最前排嘅張華峯前面糾纏，結果引發罵戰，梁頌恆鬧張華峯「你侮辱自己係香港人呀仆街」，張華峯就回應話「你仆街咩呀你仆街呀」，搞到梁頌恆好激動咁話「開片吖」。

唔關事嘅會計界議員梁繼昌此時突然行埋去，指住張華峯問佢做乜講粗口，仲幾次喝令張「坐低」。張不滿梁繼昌手指指，推一推佢隻手，點知梁繼昌隨即大動作跌落地，此舉被唔少人質疑「插水」；張華峯嘅黨友及部分建制派議員見狀亦拉走張。

張華峯認衝動梁繼昌被質疑插水

張華峯其後解釋，係迫於無奈先爆粗，強調梁頌恆當時「影響到我開會情緒，而且推到我張枱都郁埋，我個杯蓋都唔見咗」，又指佢只係呼籲梁頌恆唔好阻礙會議，對方「第一句就鬧我仆街」，「一個人一定有自然反應，我梗係回應佢，重複嗰句(粗言)」。佢承認自己衝動咗，日後會克制。佢又特別澄清有拍過梁繼昌隻手，「佢(梁繼昌)唔知點解即刻瞓低，我同佢距離一米幾，我拍佢隻手，唔知點解佢會瞓低。唔知點解佢連呢啲渾水都抽埋」。

梁繼昌就同傳媒講，張突然捉住並嘗試扭佢手腕，形容張「扭得好大力」，佢於是借勢跌低避免遭扭傷，更笑言自己平時有「練嘢」，如果認真「講手」，跌低嘅係張華峯喎。

楊：我一直都坐低咗喎

而喺會議上，泛民就同主席梁君彥爭拗點解唔處理青政兩人宣誓一事，公民黨楊岳橋同主席駁嘴，梁君彥強調裁決不容辯論，仲同一直坐喺位度嘅楊講，「楊岳橋議員，請你坐低」，楊即回應話「我一直都坐低咗喎主席」，隨即引起哄堂大笑。民主黨涂謹申其後發言前就問主席：「畀我企起身定坐低？」

更多港聞