稱陳馮富珍特首最佳人選 楊志剛：自己觀察 無內幕消息

稱陳馮富珍特首最佳人選楊志剛：自己觀察無內幕消息

[2016.12.14] 發表

【明報專訊】特首選戰如箭在弦，坊間盛傳唔同人選，將於明年6月底卸任世衛總幹事嘅陳馮富珍亦「榜上有名」。曾為前特首董建華助選嘅資深公關楊志剛，噚日喺本報觀點版撰文，形容陳太係下屆特首最佳人選，指她任職世衛期間多次同國家主席習近平會面，相信喺主席心中留下深刻印象。唔通陳太先係「真命天子」？但楊志剛同Emily講，唔係收到內幕消息，只係從傳媒報道嘅觀察啫。

楊志剛喺文章形容，陳太深受中國器重同信任，對方不「藍」不「黃」，無政治包袱，「讓『藍黃之爭』變得無聊及瑣碎，讓和諧團結變成可能」，而其他特首人選都欠奉呢啲條件。佢話，陳太上月中低調訪京，喺國家行政學院演講，思疑對方喺北京有無同習主席會面。

佢形容，要特首梁振英甘心退下，成全其他候選人絕不容易，「梁振英會反問：他們憑什麼？」但陳太「自是不同」。

翻查資料，陳太上月接受本地傳媒專訪，話完成世衛任期後會回港定居，到時希望退休享天倫樂。上月初本版亦報道，政圈流傳北京有張特首人選「十人名單」，當中包括陳太，當時世衛發言人書面回覆Emily，話陳太會百分百專注世衛工作，直到明年6月任期屆滿。

楊志剛同Emily講，自己近期無同陳太聯絡，又強調自己唔會喺嚟緊嘅特首選舉幫人助選。

更多港聞