偕太太初一玩到初七 唔計官式 曾鈺成首次遊台灣

偕太太初一玩到初七唔計官式曾鈺成首次遊台灣

[2017.02.06] 發表

【明報專訊】立法會前主席曾鈺成無職一身輕，可以「樂逍遙」，佢噚日就透露農曆新年同太太去咗台灣「避年」，由初一玩到初七；不過，將屆70歲、睇落有「鋼條」身形嘅佢，原來唔係大家諗得咁「健康」，𠵱家努力調養身子！

曾鈺成噚日接受港台節目《非常人物生活雜誌》訪問，提到以前只以官式訪問去過一次台灣，因為以立法會主席身分去台灣「麻煩」，𠵱家卸任後終於去玩。「曾主席」仲話，老婆伍嘉敏成日同佢講，要趁未太老、仲可以行得走得，有咁遠去咁遠先啱。

自爆血糖膽固醇皆高

電台主持人就讚佢皮膚保養得好，「似四五十歲啫」，點知「曾主席」就慨嘆身體「麻麻哋」，血糖同膽固醇都高，「70歲老人會出嘅問題都出晒」。

談兩段婚姻「要珍藏甜酒」

「曾主席」仲談到自己嘅兩段婚姻，話一直覺得第一段婚姻「係自己責任、好失敗」，但佢經常諗起自細媽媽教佢嘅道理：「人生就如兩杯酒，一杯甜酒、一杯苦酒，你願意飲苦酒先，甜酒可慢慢飲」，呢番說話佢喺2009年再婚時講過，佢噚日就講埋自己嘅領悟，「甜酒擺喺度，你唔識珍惜佢，佢會變質，到你真係想攞出嚟飲時，係飲唔到，要不只先飲苦酒，仲要識珍藏杯甜酒」。

評林鄭目空一切好打得

另外，曾主席接受前議員黃毓民嘅網台節目《毓民會客室》訪問，點評特首參選人，其中提到林鄭月娥嘅弱點係「目空一切」、覺得「周圍啲人都無我咁叻」，但「整整吓孤家寡人」，同時亦讚林太「好打得」，睇文件好仔細；佢又話曾俊華親和力較強係明顯優勢，同各方面都合作愉快，「另一方面被話hea」。

更多港聞