【明報專訊】前特首曾蔭權因為公職人員行為失當罪成而被判入獄20個月，佢嘅太太曾鮑笑薇噚日喺facebook寫咗封公開信，透露會喺下星期三舉行特別彌撒，呼籲大家為曾蔭權的堅強、勇氣、早日與家人重聚而祈禱。 曾太封公開信噚日係「Support Donald Tsang」的facebook群組出現，提到曾蔭權入獄以來，咳嗽、哮喘都逐步好轉，但仲要繼續食藥同接受治療，大部分時間都睇書、寫作同祈禱。 獄中收大量慰問 轉達感激 曾太提到，曾蔭權最近睇嘅書裏面，深受生前致力為貧病服務嘅天主教神父聖雲先(St. Vincent de Paul)啟發同感動，特別提到聖雲先講過嘅「內心抗拒卻仍遵從天主旨意而行的一件事，遠勝隨心所欲而得的千萬個成就」。 曾太又話，曾生收到好多朋友同支持者嘅慰問卡同信，畀咗佢好多慰藉同鼓勵，託佢向外界轉達由衷嘅答謝同感激，但係懲教處對外寄信件數量有限制，曾蔭權未能逐一回信，而收信數量就冇限制。 高院下月6號會開庭處理曾喺上訴期間保釋嘅申請。曾太喺信裏面最後提到，曾蔭權好期待喺下個星期三(3月29號)晚7點堅道大堂舉行嘅特別彌撒，希望可以同支持佢嘅人「一起」禱告。 至於「一起」嘅方法，Emily估計，可能係同時候禱告吧？
|
| |
| |
