【明報專訊】民主黨喺暑期搞咗個「民主小茶飯」實習計劃，畀啲後生仔去了解該黨工作。原來好戲在後頭，喺實習計劃中表現優秀嘅同學，下個月可以同啲「乳鴿」一齊去馬來西亞交流，立法會議員許智峯都會同行，民主黨仲會包埋同學仔嘅機票同酒店錢。 民主黨總幹事蔡雨龍話，好多年前嘅暑期實習計劃，都曾經去過台灣交流，今年希望去啲新奇嘅地方，所以揀去東南亞。蔡總話，喺實習計劃中表現優秀、有志繼續喺民主黨幫手，以及未來有心同民主黨一齊向前行嘅同學，都會一齊去交流團，今年就資助6個實習生。 實習同學今次會同民主黨員一齊去吉隆坡同檳城，了解當地政治文化，拜訪當地政黨地區組織、青年團體，以及行吓選區等，亦可能有機會拜會政府部門。蔡總話當然唔少得有輕鬆嘅環節，喺當地遊歷食吓嘢啦。交流團為期5日4夜，下月中起程，將有十幾個黨員一齊去，包括許智峯，唔知阿峯會唔會分享吓議會故事同抗爭經驗呢？
|
| |
| |
