紮鐵工潮10周年 工會搞紮鐵導賞團

[2017.08.22] 發表

【明報專訊】今年係紮鐵工潮10周年，職工盟、紮鐵業團結工會同街工等多個團體將合辦一系列工運回顧與展望活動，其中紮鐵業團結工會喺9月會舉行紮鐵工藝導賞團，市民可親身體驗各種紮鐵技術，仲有即場真人示範。

2007年8月爆發嘅36日紮鐵工人大罷工，開啟咗行業集體談判，改變紮鐵工人待遇，亦都為日後工人運動嘅抗爭同支援帶嚟啓發。當年參與罷工嘅工人、紮鐵業團結工會總幹事黃惠民話，工潮當年雖然被形容係以「贏十蚊」告終嘅「慘勝」，但最重要係成功將一再延長嘅工時，恢復為8小時工作。

職工盟組織幹事吳冠君話，2007年紮鐵工潮嘅公眾募捐支援方式，開創咗新典範，當時籌得100萬元，係職工盟首次可以為罷工嘅工人提供津貼支持生計，後來呢個方式再次套用喺2013年嘅碼頭罷工。

仲有照片展大慶典

10周年工運回顧同展望活動，包括紮鐵工藝導賞團、講座、紮鐵工潮照片展及工潮勝利10周年大慶典等，相關團體稍後會公布詳情。

更多港聞

【明報專訊】香港郵政將喺下月5日，發售一套以國學大師饒宗頤畫作同書法為主題嘅郵票同集郵品，饒宗頤特別將呢套郵票命名為「選堂筆趣」，郵票展示饒... 詳情

【明報專訊】每年萬聖節，海洋公園同迪士尼都會搞活動，等大家大玩鬼屋。迪士尼今年除咗搞鬼屋，仲新設「米奇Halloween大解謎」晚宴，等大家... 詳情