颱風重災區 杏花邨業委會變天 唔想停車場嘅車浸完一架又一架
[2019.03.25] 發表
【明報專訊】上年超強颱風「山竹」、前年「天鴿」來襲，杏花邨都係重災區，停電停水，邨內受嚴重破壞。有杏花邨居民不滿管理處、業主委員會成日坐視不理，唔想停車場嘅車「浸完一架又一架」，之前成立「杏花邨居民關注組」，關注組首次派出8人參選杏花邨業主委員會換屆選舉，結果全數當選，當中有唔少有專業背景嘅猛將，最為人熟悉嘅有香港中學校長會前主席李雪英。
呢場罕有嘅「撼莊」選舉前晚舉行，據聞過去杏花邨業委會大會不時流會，今次出席居民非常多，有近34%住戶投票，關注組8人全數當選，擊敗業委會現主席曾振平率領，包括民建聯前區議員趙承基、工聯會前副理事長陳志光等組成嘅團隊。8人得票更大幅拋離競逐連任嘅對手。
民記前區議員團隊連任失敗
上年先退休嘅李雪英，以前做香港中學校長會主席時已經好敢於發聲，今次換個身分，佢笑住話「自己係最無能力」，因團隊內有工程師、會計師等專業人士。李雪英話住咗喺杏花邨30年，之前都係水浸私家車嘅事主之一，眼見業委會年年都係咁上下班底，同居民溝通唔太多，加上經歷兩次風災，想為條邨做多啲嘢，至少喺今年風季嚟到之前，要跟緊啲防洪、海堤工程嘅進度，希望搵到排水系統問題，預防再有海水倒灌。
中學校長會前主席李雪英當選
李雪英笑言，杏花邨住咗好多能人異士，希望居民未來可多啲主動出嚟表達吓意見。
更多港聞
【明報專訊】中學文憑試（DSE）已經開考，其中考生應考語文科嘅聆聽卷同數學科時，分別要用到計數機及收音機，但Emily同大部分考生一樣，喺公...
詳情
相關新聞
