【Emily】黃錦星去頒獎禮 同沈祖堯開心合照
[2019.11.13] 發表
【明報專訊】過去數月社區不時爆發嚴重衝突，無論咩立場嘅市民恐怕都唔會開心。不過政府表明唔會停擺，環境局長黃錦星(左二)過去呢幾個月亦出席不同環保活動，好似噚日佢去咗「香港綠色學校獎」頒獎禮，又喺facebook講述呢個活動，並附有多張同嘉賓、得獎同學仔笑意盈盈嘅合照。
黃錦星話，應對氣候變化，師生應着手加強減碳減廢，包括午飯惜食咪嘥嘢、自備可重用餐具、多用手巾仔等。環境運動委員會主席沈祖堯醫生(右後)呼籲，為地球及大家健康，同行撐「零即棄校園」。
其實黃錦星喺反修例風波「平行時空」嘅舉動，引起唔少建制派不滿，佢上月底出席立法會一個會議時，民建聯主席李慧琼就質疑佢過去幾個月喺落區聽民意等方面做咗咩工夫。
更多港聞
相關新聞
