歐陸嘉年華閉幕人氣遜預期
[2015.02.23] 發表
【明報專訊】為期兩個月的友邦歐陸嘉年華噚日閉幕，主辦單位話截至閉幕前一日，入場人次達80萬，雖然未達原定目標100萬，但今年天氣不穩及開幕日期延遲，所以對數字仍感到滿意。
參加者嘆機動遊戲「勁貴」
多個攤位嘅負責人都話滿意人流及營業額，營運4款機動遊戲嘅Lorelle指生意勝預期，而今年時晴時雨，始終影響人流，但見入場者都非常享受。另一機動遊戲負責人Stanley感覺人流較8年前嘅嘉年華少，營業額遜預期，但整體仍滿意，對於入場者認為機動遊戲收費過高，佢就話成本、運費同租金高昂，收費算合理。
噚日下晝開始有微雨，擲公仔、機動遊戲嘅攤位都未見有太長人龍。有入場市民話氣氛熱鬧，但落雨始終影響心情，而唔少人都反映今年機動遊戲收費太貴。
梁小姐三姊妹同老公、男友一同入場，佢哋覺得機動遊戲「勁貴」，一般40至100元不等，所以一個都無玩，最後共花600元擲到4隻公仔，若下年續辦，都話要睇吓價錢再考慮。黃太一家四口花咗1000元，玩咗一個機動遊戲同擲到3隻公仔，佢哋希望下次可以一張飛任玩機動遊戲。
更多港聞
【明報專訊】唔少人都想趁農曆新年發一筆橫財，六合彩新春金多寶噚晚攪珠，頭獎彩金累積達4000萬元，吸引大批市民落注，總投注額1.2億元，惟最...
詳情
相關新聞
