【明報專訊】立法會主席曾鈺成不滿特首梁振英，雖然無講出口，但似乎已經係公開秘密。曾鈺成噚日就再喺報章撰文，全文無提梁振英個名，但就談領袖「管治」。曾主席話，就算係唔能夠「以德服人的管治者」，喺施政上都唔可以「一味靠『猛』」。 曾主席噚日喺《am730》專欄以「寧猛毋寬」為題撰文，借春秋末期鄭國卿大夫子產對兒子大叔嘅心得，比喻管治者施政時，要喺「寬鬆仁厚」同「猛烈強硬」之間取得平衡，佢話，「只有德行很高的管治者，施政才可以寬鬆仁厚，人民心悅誠服；德行不那麼高的，施政就寧可猛烈強硬。猛烈如火，人們望而生畏」。 曾主席話，唔識攻心嘅管治者，往往缺乏審勢嘅智慧，「因而寬嚴失度；且多是失諸過猛，寧猛毋寬」，強調孔子認為管治者施政要「寬以濟猛，猛以濟寬」。究竟主席想邊個自省？相信讀者睇完自會心領神會。
|
| |
| |
;)
