【明報專訊】民協前主席莫嘉嫻今年6月退出民協，經過近5個月嘅思考同觀察，近日正式加入民主黨，仲肩負培養「乳鴿」嘅重任𠻹。原來嘉嫻去咗九龍東幫手，協助嗰區嘅立法會議員胡志偉培養新人，但同時都會返「老巢」九龍城幫手地區工作。嘉嫻話現時九西、九東兩邊走，工作非常忙碌。 九東九西兩邊走 嘉嫻年中退出民協後，先有民主黨九龍西立法會議員黃碧雲游說佢入黨，後有黨主席、九龍東立法會議員胡志偉親自邀請，結果喺近日正式加盟民主黨。嘉嫻地區經驗豐富，會主力幫手培養白鴿黨九東嘅新人。被問到會唔會再戰下屆區選，嘉嫻笑住話唔排除任何可能。 嘉嫻曾經喺九龍城馬頭圍做足16年區議員，今次由九龍西轉去九龍東做地區工作，佢話係想有新發展，加上受到胡志偉邀請，「志偉搵我去幫新人」，所以落戶九東。佢話初到貴境，暫時未落實去九東邊區，𠵱家都係周圍觀察吓。
|
| |
| |
;){kind=small}
;)
