【明報專訊】民建聯立法會議員鄭泳舜(Vincent)可以話係運動健將，多次參加三項鐵人賽，但自從上年初參選立法會後冇乜時間運動，明顯肥咗。佢話報咗名參加下周保良局慈善跑嘅半馬賽事，形容係「復出之作」。 Vincent同Emily講，其實過去經常跑馬拉松，試過3個零鐘跑完全馬，業餘嚟講成績都相當唔錯；但係參選立法會之後都冇跑過，計落都足足一年啦。Vincent話一向都想減肥，所以一個月前就報名參加半馬賽事，不過佢開始練習後就發現好辛苦，稱10幾年來都冇試過個身咁重，唯有早啲起身練跑，抽時間跑多幾轉再練吓。 目標「跑完就得」 問到目標時間，Vincent就話以前都會追成績，但今次就旨在參與、「跑完就得」，希望可以跑到尾唔使行路，佢話因為今次參加嘅路段，其中北潭涌一帶都多上落山，所以都要練多啲。Vincent嚟緊都報咗名參加渣打馬拉松嘅10公里賽事，相信到時就會輕鬆啲啦。
|
| |
| |
;)
