【Emily】2021年公眾假期刊憲 清明復活節請假3日 放足10日
[2020.05.16] 發表
【明報專訊】打工仔請假「攻略」又嚟嘞！政府噚日刊憲列出2021年嘅17日公眾假期，因為下年嘅復活節連住清明節假期，5天工作嘅打工仔可以喺4月2至6日連放5日假，如果之後3日再請埋假，就可自製10日長假。另外，下年嘅農曆新年有4日假期，如另請假4天，亦可放10日悠長假期。
政府發言人話，下年嘅清明節係星期日，所以翌日(4月5日)補假，而清明節翌日同復活節星期一重疊，復活節星期一翌日(4月6日)變咗增補公眾假期。5天工作嘅打工仔可以喺4月2至6日連放5日假，只要隨後3日請假，4月2至11日就可放足10日假。
年初二勞動節聖誕節無得補
至於下年嘅農曆大年初一同初二係2月12日同13日，年初三2月14日情人節係星期日，翌日2月15日有補假，打工仔喺2月16日起請假4天，連埋周六同周日就可自製10日長假。
至於下年聖誕節假期，係由12月25日放到27日，打工仔請定之後4日假，連埋2022年元旦同1月2日嘅周六、日，就可以有9天假期。如果嫌年底太遙遠，下年5月19日佛誕係星期三，如果請2日假，都可放5日唞唞。不過，下年嘅2月13日農曆年初二、5月1日五一勞動節同12月25日聖誕節都係星期六，按法例無得補假，變相蝕咗3日假。
更多港聞
【明報專訊】DSE歷史科試題考到近代中國史，令到大家呢兩日對中國近代史料突然興趣大咗，《毛澤東外交文選》噚日就成為網上熱門選讀材料，有人引述...
詳情
【Emily】DSE歷史科題目風波 CY批教協 tag埋「黑警」
【明報專訊】前特首梁振英（CY）無做特首後，改係網上月旦時事，噚日當然唔會錯過談論DSE歷史科題目，佢仲將事件扯到去警察問題，話文憑試歷史科... 詳情相關新聞
