【明報專訊】今年係六四25周年，大家望到頸都長嘅六四紀念館永久展館，終於喺今個月20號開張，暫定由15號起試展，等市民畀吓意見。支聯會主席李卓人同Emily講，新館嘅展覽內容同之前差唔多，不過設計就好特別，希望令大家「喺感性上留下一個深刻嘅感受」，Emily都好想知道係點，但阿人就話賣個關子先。 同之前一樣，新館繼續展出子彈殼等實物，但除咗常設歷史展覽，新館多咗個專題展，第一個展題係「廿五年來說六四——變與不變」，會對比吓中港政界人士喺過去25年嘅言論有無前後不一，咁當然唔少得梁振英(CY)。阿人話展館嘅10蚊門票會用嚟幫補供樓同職員嘅人工等營運費，紀念館歡迎學校同團體預約，每團約30人，將六四嘅真相傳畀下一代。 ■六四紀念館詳情 地址﹕尖沙嘴柯士甸路3號富好中心5樓 開放時間﹕ 周一、周三至五﹕上午10時至下午6時(周二閉館) 周六、日及公眾假期﹕上午10時至晚上7時 查詢或預約電話﹕2782 6111 入場費﹕10元(全日制學生、12歲或以下兒童等可購半票)
|
| |
| |
