【明報專訊】現時失業率低，企業請人難，而如果社會肯畀機會更生人士就業，當然可以提供唔少勞動力。廠商會就做媒人角色，自2014年起搞在囚者招聘會，等佢哋刑滿後可以投入工作，重過正常生活，噚日就搞咗個「聘出未來」視像招聘會，撮合僱主及在囚者。 廠商會今年籌集到超過800個職位空缺，職位涵蓋建造、工程、商業、飲食、零售及物流等，可見社會及僱主對更生人士接受程度日益提高。噚日嘅招聘會，就有超過40個僱主與逾200名將於3個月內獲釋嘅在囚者或正在受監管嘅更新人士面試。 廠商會今年仲新增「持之以恆」獎勵金，凡通過「聘出未來」招聘會受聘，由入職日起計工作滿一個月，即可獲發1000元嘅一次過獎勵金，目的係鼓勵佢哋堅持工作。
|
| |
| |
;)
