「亂」當選民建聯年度漢字 曾鈺成稱無能力「平亂」
[2016.12.30] 發表
【明報專訊】2016年將盡，民建聯噚日第四年公布「香港年度漢字」投票，市民選出「亂」字形容過去一年。該黨副秘書長葉傲冬話，今年有逾13,000人投票創新高，其中「亂」字以3776票脫穎而出，緊隨其後嘅係「穩」字，獲2028票。
「我哋需要有管治能力嘅人」
民建聯創黨主席、立法會前主席曾鈺成噚日除咗即席揮毫寫「亂」字，仲再次化身老師，解釋「亂」字由來。曾鈺成話，亂字左上角嘅「爫」其實係「爪」，左下原本係「手」字，中間加上代表織布架嘅「冂」，仲繞住一啲絲，就表示亂。佢又引《說文解字》話：「亂，治也」，咁點解「亂」會解作「治」呢？因為用手理順咗啲絲，即係將亂局變成有條理，呢啲就係管治嘅精髓，所以由「亂」到「治」，「我哋就需要有管治能力嘅人」。
曾鈺成話，雖然過去一年市民感覺香港多咗亂象，例如大年初一嘅旺角事件、立法會開局情况，不過相信大亂後大治，香港有能力之人可處理。佢又話香港係「人心思定」，希望亂象盡快過去，故亦有好多人揀咗「穩」字作年度漢字。
不過在場記者又點會放過呢名潛在疑似特首參選人呢？記者問曾鈺成會唔會出嚟「平亂」，佢笑笑口答「我無咁嘅能力！唔敢唔敢」，又話現時唔係「平亂」嘅問題，香港今日矛盾只係發展當中出現嘅問題，相信大家包容共濟、互相體諒就可以解決。
更多港聞
【明報專訊】由一班資深新聞工作者，以及新聞學者創辦嘅新媒體《眾新聞》將會喺元旦日面世。非執行董事麥燕庭話，《眾新聞》理念係希望回歸新聞初心，...
詳情
相關新聞
