長毛過到關 劉國勳好開心
[2017.04.15] 發表
【明報專訊】立法會發展事務委員會組團考察東江水兩日，無(回鄉)證嘅社民連梁國雄(長毛)，早前攞到一次過嘅通行證，噚日朝早同其他議員一齊成功過關「睇水」，隨團嘅民建聯劉國勳似乎最戥佢開心，一見到長毛過咗內地關口，即刻上前握手搭膊頭，仲用普通話講「歡迎歡迎」，非常親切。劉國勳其後又喺facebook咗上長毛入境內地嘅相，留言「唔搞事真係冇人阻你來」。
同樣隨團嘅公專聯莫乃光噚日就喺facebook上載短片，片中見到長毛過完內地關口，隨即傳嚟熱烈拍手聲，連企喺後面嘅內地人員都笑咗。長毛過關時被搜到帶住印上「四五行動」字眼嘅卡片，畀關員查問，佢過咗關後其他議員都關心佢情况，長毛就話佢有畀卡片職員，但對方唔要，團長劉業強就笑住話﹕「你成個人已經係宣傳品嚟架啦」。
已經多年無返內地嘅長毛，過關後似乎心情唔錯，有人問佢係咪覺得好開心，佢微笑舉起食指「殊」咗一聲，然後簡單回應一句：「睇嘢(考察東江水)。」
更多港聞
【明報專訊】去年落選立法會嘅前議員黃毓民，噚日喺facebook貼出8000字長文，表明自己會「向政治說再見」，「不再從政，退出政壇；包括不...
詳情
相關新聞
