【明報專訊】洪永城於前年曾前往北韓拍攝無綫旅遊節目《在那遙遠的地方》，了解當地文化及生活。上周二(13日)在朝鮮被扣押17個月的22歲美國大學生瓦姆比爾，突然獲釋回國，但已陷入植物人狀態，周一(19日)離世。 犯低級錯誤 洪永城看到瓦姆比爾的新聞，令他憶起當日赴北韓發生的驚險事。他昨日在facebook自爆曾犯低級錯誤，過關時被發現帶着北韓書；當時他驚到震，要簽悔過書，他慶幸最終沒事。 洪永城在fb上載拍《在那遙遠的地方》的照片，並發文說：「見到美國大學生俾(畀)北韓控告偷取政治標語，回美國後病逝嘅新聞。聽講佢係喺羊角島酒店偷咗一張金正恩肖像嘅海報，被判勞改15年，諗返起，覺得自己非常幸運。」 成身驚到震 他續說：「兩年前去北韓，當時我由中國丹東進入北韓平壤海關嘅時候，我犯咗個低級嘅錯誤，我帶咗本喺香港買嘅北韓書，我唔記得擺低喺中國。老實講，有關於北韓嘅書都冇乜邊本係講好嘢㗎喇，最弊就係封面套咁啱係將金生嘅肖像摺咗一半，佢一搵到嗰一刻，我成身喺度震，當地官員睇到即刻拉我入去一間房，問我本書講咩喎？我梗係話唔知啦！睇都未睇過……但唔知邊度躡(攝)出嚟一位識普通話嘅女士，揭開本書喺度讀喎，好彩本書唔係我寫，之後佢淨係要我簽一份悔過書，要我承認本書唔係我寫、唔贊成書入邊寫嘅嘢、無意威脅金正恩嘅政權等等……之後就俾(畀)我走，最後講咗句"no worry, enjoy your journey"。 」洪永城最後提醒大家：「如果你哋下次去北韓，千祈千祈唔好帶北韓嘅任何資料，同埋唔該你哋delete晒電話入邊金正恩嘅圖片，祝大家好運。」 娛樂組
|
| |
| |
;){kind=small}
;){kind=small}
;)
