【明報專訊】民陣召集人岑子杰遇襲後，網上曾有人話要「裝修」重慶大廈，最終有示威者前往保護，清真寺被警方射藍色水後，更有聲音話要幫襯多啲重慶大廈。立法會議員區諾軒(區軒)噚日就出post，話自己熱愛印巴美食，「我絕對願意、樂意、有意介紹各位去重慶大廈食咖喱」，仲大讚「抵到爛」。 區軒喺fb話，自己去旅行通常都會去重慶大廈兌換外幣，「無他，匯率好」；之後會搵餐廳食飯，話晚市一碟菜，加埋印度薄餅或者黃薑飯，都係40蚊有找；噚日佢就忙裏偷閒去食晏，午市套餐再加雜菜乳酪、Masala tea(印度奶茶)夾埋都係66蚊，「抵到爛！」 區軒仲提供小貼士，佢話有啲舖頭如果冇特別要求，就會主動畀午市套餐，「唔係佢搵你笨，而係邊個都係咁比(畀)」，想食其他嘢就要出聲；佢仲話樓上會有較正式餐廳，選擇更齊全，水準都更好，但都更貴。
|
| |
| |
;){kind=small}
;)
