【Emily】議規諮詢 流會倡罰缺席者一日薪

[2021.05.22] 發表

【明報專訊】立法會議事規則委員會有意作多項修改，噚日向全體議員發信諮詢意向，包括如因未夠法定人數而流會，無合理原因缺席會議嘅議員要受財政處分，金額為議員一日嘅人工(即約3400元)，又限制喺點算法定人數時，所有議員都唔可以離開會議廳，直至夠人或休會為止。

唔畀衣飾展示口號標語

議員開大會時嘅衣著方面，諮詢問及係咪同意明文規定議員要著「商務衣飾」開會，仲有附件列出建議嘅「負面清單」，包括展示標語、口號等嘅衣飾；破損或有破洞嘅衣物、運動裝等，上身類如T恤、背心等，下身則唔應該著牛仔褲、短褲、運動褲；鞋同樣有限制，包括唔可以著涼鞋、拖鞋、波鞋、工作靴、雨靴同任何種類嘅露趾鞋。

諮詢又問到，議員係咪同意限制事務委員會嘅議員人數上限為20人、法案委員會上限為15人，每個議員最多同時出任6個事務委員會委員等。根據諮詢文件，議員要喺各項問題表態係咪支持或有無其他意見，最遲28號(下周五)要回覆秘書處。

更多港聞

【明報專訊】民主黨上月初開始賣獎券籌款，全港多區都見到佢哋嘅街站，目標籌400萬元。籌款委主席袁海文（Ramon）噚日話畀Emily知，早兩... 詳情

【明報專訊】全長1.4公里嘅啟德空中花園噚日正式開放，市民又有消閒好去處。負責工程嘅土木工程拓展署話，啟德空中花園係全港首個建於波浪形隔音屏... 詳情