澳籍馬恩國自比岳飛 倡反港獨法 「願做衛國擦鞋仔」

澳籍馬恩國自比岳飛
倡反港獨法「願做衛國擦鞋仔」

[2015.04.09] 發表

【明報專訊】中澳法學交流基金會執委會主席、大律師馬恩國(Lawrence)近日積極為佢提出嘅《反港獨法》護航，被人質疑係「奉承」，本身係民建聯成員嘅Lawrence噚日上電台時再爆「金句」反駁，話「宋朝有個大將叫岳飛，佢阿媽喺佢背上刺咗『精忠報國』四個字。如果你認為岳飛係擦鞋仔、擦宋朝的鞋，我甘願同岳飛一齊做一個保家衛國嘅擦鞋仔，講完！」

陳健民﹕請先棄護照

呢句說話，引來佔中發起人之一陳健民(KM)喺facebook點評，「唔該岳飛先放棄外國護照。You are not even a fxxxing Chinese wor！」點解KM咁講？原來曾經有報道話，Lawrence仲留住本澳洲護照，即係唔係「中國人」。郭榮鏗都加把口同Emily話，馬大狀可能係「有外國護照嘅岳飛」！唔通Lawrence想做「澳洲岳飛」？

馬：外國籍一樣愛國

Lawrence就無講自己有無留住澳洲護照，但話呢個唔係point，因為就算有外國護照，唔少海外華僑，都一樣愛國。

至於英文嗰句連Emily都唔敢亂咁講嘅說話，查實係2013年2月Lawrence喺立法會一個聽證會上，鬧議員「長毛」梁國雄嘅用語，當日Lawrence仲因為粗口事件，被大律師公會罰佢做「釘牌大狀」一個月。