揮筆尋回歡樂 高錕首開畫展

揮筆尋回歡樂高錕首開畫展

[2015.09.23] 發表

【明報專訊】諾貝爾物理學獎得主、中文大學前校長高錕(圖)近年患咗腦退化症，大家都好關心佢嘅情况，原來高錕教授近年醉心繪畫，畫畫成為佢嘅良藥，幫助手部協調和運用。「高錕慈善基金」為咗慶祝成立5周年，幫高教授搞咗個個人巡迴畫展，展品包括佢首幅畫作，以及送畀太太黃美芸嘅溫馨禮物《生日快樂》。

高錕巡迴畫展第一站喺又一城舉行，展出32幅作品，展期由即日至10月4日。呢批畫作主題分為「花卉」、「動物」、「交通工具」、「風景」和「節日」，大部分作品都色彩斑斕，見證高教授呢兩年來學畫嘅心路歷程。

展出首作《許願樹》

畫班導師Polly話，畫筆同畫布之間距離雖然小於1厘米，但對患病嘅高教授來講，就好似人類從地球去月球嘅距離，因為認知障礙令高教授易忘記握筆技巧，所以佢第一課嘅作品係空白畫布！不過，喺短短一個月時間，高教授已可以開始用畫筆去接觸畫布，雖然初時只畫零碎嘅點同線，但已經係大躍進！《許願樹》就係教授第一幅「點」出色彩嘅作品。

高太就話，腦退化症剝奪咗高教授人生唔少樂趣，但繪畫幫佢尋回唔少歡樂。Polly話，高教授大部分畫作都集中喺左下角，係因為認知障礙症限制咗手部嘅活動，不過呢個限制反而成為佢嘅獨特畫風。

高錕畫展提供導賞，想欣賞畫作及知多啲「腦退化症」資料，可瀏覽基金會網頁﹕

www.charleskaofoundation.org

更多港聞