【明報專訊】選戰將近，唔少議員都拍攝新一輯個人相，執靚個樣，但部分人執得太過分，就有可能畀人笑係「失實聲明」。社民連梁國雄噚日喺審議改革醫委會條例，坐喺會議廳內突然好大膽同民建聯蔣麗芸(Ann姐)提出，見到對方傳單個樣，自己完全認唔到，暗示緊Ann姐P晒圖。佢仲話，「你張傳單咁嘅樣，一陣間投錯票就唔好啦，投咗畀游蕙禎就無謂啦」。 其實年齡同樣貌對女人來講都好敏感，Ann姐聽完即扯火，見到長毛行出會議廳，佢即刻跟住行，去到會議廳外面對住長毛大聲嗌：「你望清楚我眼耳口鼻啦，我(張相)化咗妝呀，我𠵱家無化妝咋！」又話「你投畀游蕙禎啦，投畀你心目中嘅貞子！」雖然Ann姐激到發火，不過長毛就依然笑笑口回應「話你靚咋，為你着想」。 其實噚日長毛仲辣㷫咗議會內另外一個女人，就係工聯會麥美娟(Alice)。事關佢喺醫委會發言期間，大罵建制派係「西環黨」，搞到Alice當場反駁，話無受到中聯辦干預，仲話「工聯會落柯打嘅唔係張曉明，係麥美娟」，十分霸氣。
|
| |
| |
;){kind=small}
