高官新年祝願 記掛一帶一路

高官新年祝願記掛一帶一路

[2018.01.01] 發表

【明報專訊】新年伊始，林鄭月娥班子趁機向市民祝願新年快樂及談談2018年工作重點，林太同Emily講，希望與市民同行，建設香港，話希望等大家可以抱有希望、感到幸福。講到未來機遇，4個官員不約而同大力唱好「一帶一路」，5人話要落實「大灣區」工作幫年輕人搵機遇。

財爺話2018經濟審慎樂觀

Emily向特首、3司長及13局長了解各部門2018年嘅工作重點及各人願望。林太話喺國家大力支持下，把握「一帶一路」建設和粵港澳大灣區發展帶來嘅機遇，推動香港發展。講開經濟，財政司長陳茂波就話「展望2018年，我對本港經濟感到審慎樂觀」，而2月發表新一份財政預算案，會善用資源令新政府關愛社群嘅措施開展。

熱愛工作嘅政務司長張建宗就話，冀望盡快落實今屆政府首份施政報告250多項利民惠民新措施，仲話要以勤奮、認真、務實、謙卑及以民為本嘅態度服務巿民，為香港帶來新氣象。

林太袁國強提一國兩制

近期高鐵一地兩檢引起法律爭議，各人回覆中，林太、律政司長袁國強、政制及內地事務局長聶德權都提及「一國兩制」，其中盛傳將離任、重投法律精英行業嘅袁國強就寄語，「希望社會各界能夠以理性包容、互相尊重的態度為香港共謀發展」。佢話只要大家維護香港核心價值，包括法治精神，共同貫徹「一國兩制」嘅大原則，香港前景必然樂觀。

勞福局長羅致光就提醒老友記，長者生活津貼資產限額已經放寬，而每月3435元嘅「高額長者生活津貼」，預計將於今年中實施。勞工政策方面，政府建議將法定侍產假由3日增加至5日，亦會開展延長婦女產假嘅研究。教育局長楊潤雄話，舊年落實咗免費優質幼稚園教育政策及36億元教育新資源等工作，新一年會就多個範疇檢討，包括自資專上教育、家長教育等。

更多港聞