【明報專訊】中聯辦主任王志民平時喺活動上用普通話致辭，都鍾意夾雜一兩句廣東話，佢要求中聯辦員工「學粵語、講粵語」以「走進香港市民」。中聯辦網頁噚日轉載一篇《人民日報海外版》嘅報道，話香港中聯辦掀起咗一片「粵語熱」，組織咗200幾名員工喺放工後去上堂學廣東話。 報道引述，其中一名員工趙振國話，自己負責聯繫青年，試過有次活動要上台影大合照，但坐咗大半日都聽唔到自己個名，原來司儀一早叫過，係佢聽唔明；又話香港青年好努力學普通話，為到內地更好學習，佢喺香港工作，「有理由不學(廣東話)嗎？」有員工話，學廣東話係排除障礙，「為兩地深化合作交流、中央持續出台惠港便民政策打下了基礎」。 為中聯辦安排廣東話培訓嘅係香港管理學院，負責人于克凌話培訓班都喺夜晚上堂，有啲離中聯辦大樓好遠，但學員出勤率好高，課堂學習氣氛濃厚。 于克凌提到，超強颱風「山竹」襲港後，中聯辦粵語培訓班學員都有組織去到杏花邨同銀線灣清理垃圾，藉此練練口語。
|
| |
| |
