何志平開庭6件事 西裝衫褲鞋襪belt 要求法庭頒令監獄接收
[2018.11.21] 發表
【明報專訊】民政事務局前局長何志平涉賄非洲高官案，喺美國時間26日早上、即本港時間26日(周一)深夜正式開審。何志平將要面對陪審團嘅審訊，辯方最近就向當地法庭申請，要求法庭頒令監獄接收一批衣物，包括西裝、恤衫等，畀何志平上庭時著。
69歲嘅何志平舊年11月被捕後，一直還押紐約大都會懲教中心，佢之前都出席過好幾次案前聆訊，每次都係著囚衣上庭。臨近正式審訊，何志平一方喺當地時間19日向法庭提交申請，要求法庭頒令紐約大都會懲教中心接收一批衣物，畀何志平喺審訊期間著。辯方喺申請入面列出咗衣物嘅詳情，包括3件西裝外套、3件恤衫、2條褲、6對襪、1對鞋，仲有1條皮帶。
代替囚衣 上庭時著
今次案件嘅審理，何志平除咗會面對法官，仲會有陪審團，根據美國當地法庭網站嘅資料，每宗案件嘅陪審團介乎6至12人。
辯方又繼續向法庭申請，禁止已撤銷控罪、轉為特赦污點證人嘅塞內加爾前外長加迪奧(Cheikh Gadio)出庭作供，辯方認為加迪奧覺得何志平係行賄，只係因為何志平畀咗一筆現金乍得總統德比，令加迪奧感到驚訝，認為加迪奧嘅意見對陪審團審理案件無幫助。
更多港聞
【明報專訊】國家人權機構全球聯盟今年初發表報告，用是否符合「巴黎原則」評論全球各地共120個人權機構，當中香港嘅平機會18年來都只係得最低嘅...
詳情
2%「特殊校情」暫未獨立成科 讓路初中中史 學校減工藝世史課時
【明報專訊】上學年全港約有一成中學，即40多間學校無將初中中史獨立成科。2017年《施政報告》敲定，2018/19學年落實將初中中史成為獨立... 詳情相關新聞
