何俊賢「找數先嚟絕症」論被轟 Ann姐祝陳淑莊手術順利
[2019.04.25] 發表
【明報專訊】佔中9人案噚日判刑，被告之一公民黨立法會議員陳淑莊(Tanya)因突然發現腦部有腫瘤須緊急做手術，法官押後至6月10日判刑。民建聯議員蔣麗芸(Ann姐)喺fb祝福陳淑莊「手術順利，回復健康後能從容面對審判結果」；Ann姐嘅黨友何俊賢就喺自己fb批評「一到找數，個個都身患絕症。你玩晒啦」，結果被大批網民炮轟。佢回應網民話只係「有感而發」，形容「我不想見到用這原因去延(遲)判(刑)」。
話表達能力唔夠好
何俊賢之後再出第二則帖文，自稱「對事不對人」，形容事件中見到「各種走數方式」，「整件事情埋門一腳去表現他們的『情操』時竟反高潮來個『延遲』判決」，佢不能理解，亦唔知陳淑莊交呢份醫療報告嘅原因係咩等。佢最後話自己係有感而發，「可能有人聽了不舒服，但也只能說聲不好意思了，我表達能力不夠好」。
對於何俊賢言論，民建聯主席李慧琼(Starry)形容佔領運動帶來好大影響，唔同人有唔同感受，評論係「在所難免」，但Starry都有補充，希望Tanya盡快康復、身體健康。
莫乃光批「諗吓點面對番自己」
專業議政議員莫乃光就話，當Tanya重返議會後，難以想像何俊賢可以點面對Tanya，寄語何議員「諗吓自己作為一個人，點樣去面對番自己」。
更多港聞
【明報專訊】政府預料最快2020年底落實垃圾徵費，但自從舊年12月立法會成立法案委員會以來，至今只開咗5次會，距離立法會休會剩番兩個月左右，...
詳情
【明報專訊】負責就公務員聘任、晉升同紀律事宜向特首提供意見嘅公務員敍用委員會，近日發表2018年年度報告，透露去年就40宗公務員違紀個案提供...
詳情
相關新聞
