【明報專訊】反對《逃犯條例》修訂風波引發持續抗爭，唔少示威者都帶定各樣裝備保護自己，有網民近日喺網上發表圖文並茂攻略，建議網民去12蚊店購買「野餐物品(網民近期以野餐暗喻示威等行動)」，其中建議以反光質料嘅厚身浴帽「遮CCTV (閉路電視)」，可以「成頂帽笠住個CAM」，有網民就形容呢個建議「滿分」。 呢輯圖文入面，網民建議喺12蚊店買「冰袖」，可遮蓋紋身同「擋椒」，形容「待用時較保鮮紙涼爽」，但「防椒」能力不及保鮮紙，仍要配合保鮮紙使用，相信係講緊預防警察使用胡椒噴劑。網民又建議買平價拖鞋，「(野餐後)換完鞋先走」，更呼籲買一堆畀其他人。 仲有疊式座墊，話既可當枕頭瞓，又可當座墊用；又建議購入可以夾喺眼鏡嘅黑超鏡片，「戴眼鏡者到野餐地點後，可夾喺眼鏡上遮樣」。至於另一幅圖文就明言提及警察，話可以用BB地墊膠配以鐵網同索帶，製作「輕便盾」，「可以將材料帶到現場先組合，以免沿途被警察抄牌」。
|
| |
| |
;){kind=small}
