【明報專訊】太子站8．31事件過後，唔少傳言話有人被警察毆打至死，甚至有指有6人斷頸亡；民建聯立法會議員蔣麗芸(Ann姐)早前呼籲死者家屬搵佢求助，佢噚日就話呼籲咗3個星期都冇人聯絡佢，加上問過局方都話冇事，所以認為係假新聞，但呢類消息令唔少年輕人、小朋友以為有人身亡而傷心流淚，「呢類煽情假新聞，搞到太子站垃圾堆咁，啲嘢爛晒，應唔應該立法(規管假新聞)？政府應該認真考慮」。 話區選將近 怕連儂牆抹黑建制 連儂牆爭議亦受到關注，Ann姐話過往政府唔希望清潔工人處理時會同人爭執，所以採取容忍態度；但佢認為區選臨近，連儂牆上貼有抹黑建制派候選人嘅字句，所以佢認為喺報名期前應該解決連儂牆嘅問題，因為地區內每個候選人只得一小部分地方宣傳，如果有人用連儂牆抹黑對家，唔係太公平咁話。
|
| |
| |
