【明報專訊】啱啱喺星期二畀英國安格里亞魯斯金大學撤銷榮譽法學博士學位嘅何君堯，唔滿意民主派議員喺今年8月保安事務委會職務探訪，即警方展示水炮車活動期間，抗議大叫時講咗啲佢認為誹謗佢嘅嘢，前日入稟高院控告林卓廷等3名議員，仲要求法庭頒禁制令，禁止發布相關言論同埋賠償。 告林卓廷郭榮鏗毛孟靜 3個被「點名」議員林卓廷、郭榮鏗、毛孟靜隨即回應，阿廷手持一張網傳7．21何君堯同元朗白衣人握手嘅影片截圖。原來阿廷上星期已出律師信，要求何君堯收回喺facebook指控佢係7．21事件主謀嘅誹謗言論，更要何君堯喺10月31日或之前回覆。 阿廷：咁樣做係唔會令我驚 阿廷本來已搵律師告何君堯，點知何君堯同日入稟高等法院，反告阿廷幾個誹謗。阿廷話好多市民想知何君堯係咪同7．21事件有關，議員代為質問責無旁貸，仲話「打呢場官司，絕對有信心，放馬過來」，話何君堯「咁樣做係唔會令我驚」。
|
| |
| |
