【明報專訊】內地官媒好關顧香港警隊，近期同警察做咗唔少獨家訪問，清一色唱好。新華社最近又訪問咗幾個喺反修例風暴執勤嘅年輕警員，其中有位「90後」女督察有份喺理大警民衝突出動，話面對示威者攻擊要保持克制，要控制現場同事情緒，所以要更加冷靜。佢仲話已經畀人「起底」，但都唔怕而接受訪問。 提及被起底 阿爸資料都被公開 女督察姜蘊純曾經喺理大附近高舉「大聲公」呼籲市民撤離，佢喺訪問話，面對示威者攻擊要保持克制，作為督察，自己要更冷靜，向同事樹立榜樣。 呢個訪問講到警察受汽油彈等襲擊，但無提警察喺紅磡及尖沙嘴嘅催淚彈「放題」，其實據警方事發公布，單係11月18日民間發動「營救理大」行動，警察當日已放咗至少1458枚催淚彈，數字未計之前理大攻防戰嘅槍彈。 唔少警察畀人「起底」，姜蘊純話有日突然收到一張截圖，發現自己嘅相、社交平台帳號、出生日期、住址都被公開，幾日後連爸爸資料都畀人公開。佢話收到好多騷擾電話，當時好擔心家人安全，但覺得自己係做緊正確嘅事。
|
| |
| |
;){kind=small}
