【Emily】民建聯捐300萬 設基金助失業家庭
[2020.03.04] 發表
【明報專訊】政府上周宣布特首、問責官員同埋行會成員會捐出一個月人工後，民建聯亦話13個立法會議員合共捐出300萬元，噚日佢哋宣布會用呢筆錢成立「愛心基金」，向因疫情而失業、處於水深火熱嘅家庭發放一筆過現金津貼。300萬元除開13個議員，平均每人23萬元，多過兩個月議員人工，不過，被問到每個議員各自捐咗幾多錢，主席李慧琼(Starry)就唔肯講，話大家捐款係「由心出發」，唔想畀壓力個別黨員。
李慧琼唔肯講議員各捐幾多
民建聯話會視乎失業家庭嘅情况，向每戶發放2000至5000元嘅現金津貼，預計有600至1500個家庭受惠。該黨會爭取下星期開始透過地區服務點接受申請，本月底截止，申請人須提供失業證明，基金會盡快審批同發放津貼。
Starry話300萬會用作種子基金，佢話政府推出嘅抗疫基金無涵蓋失業資助，而財政預算案未通過，所以希望透過「愛心基金」即時幫助處於水深火熱嘅市民。
該黨立法會議員蔣麗芸話，近日落區收到好多求助，好多市民話下個月就無飯開，真係等唔到政府嗰1萬蚊。Starry呼籲各界踴躍捐款，正邀請黨內成員，包括中委、監委等響應，等基金惠及更多人。
更多港聞
【明報專訊】環保署轄下嘅環境運動委員會（ECC），一向負責宣傳教育工作，環保署吉祥物大嘥鬼噚日罕有著住西裝，幫手宣傳委員會招聘宣傳經理。
...
詳情
相關新聞
