【Emily】民政處唔畀「香港加油」做燈飾 區議員教7式甫士 倡到觀塘海濱打卡
[2020.12.25] 發表
【明報專訊】睇燈飾係其中一個聖誕節目，但今年唔係區區有燈飾，觀塘區、中西區係少數有區議會燈飾嘅地區。觀塘區議員王偉麟前日喺facebook發文，介紹觀塘海濱花園佈置咗一系列聖誕燈飾，建議大家趁假日帶女友、老婆嚟影相打卡、吹吹海風。
觀塘中西區有區會聖誕燈飾
王偉麟仲非常貼心，親自落場教授點擺甫士影相：坐喺度、跪喺度、趴喺度……諗足7款甫士，從扮頭痛到腳踝關節痛，Emily都覺得創意十足。
中西區亦添置咗聖誕樹同雪人燈飾，區議員張啟昕喺fb話，今年因為疫情，大量活動要延期或取消，所以區議會有唔少資助撥款未用到。為咗令撥款用於社區，中西區決定設置節日燈飾，希望居民可以喺屋企附近感受節日氣氛，街坊可以去豐物道海濱同上環文化廣場觀賞燈飾。
話影響社會和諧 只准「恭賀新禧」
至於油尖旺區就冇咁順利喇，燈飾設計一波三折，先係「連登豬」圖案畀民政事務處反對，前日連「香港加油」字句都唔畀用，政府發信向區議員解釋，話「有見社區對區議會宣傳物品的關注，為免引起誤會及影響社會和諧」，所以只採納「恭賀新禧」為燈飾字眼，預計月尾正式亮燈。
更多港聞
【Emily】WhatsApp呃錢騙徒 最新扮鄺葆賢
【明報專訊】Emily噚日提過，有人喺WhatsApp冒認羅健熙、蕭亮聲兩個區議會主席，原來騙徒冒認嘅唔止兩個主席，葵青區議員梁志成亦話收到... 詳情
【Emily】林鄭聖誕卡寄議員 藏香港十大標記
【明報專訊】特首林鄭月娥寄聖誕卡畀立法會議員，祝議員聖誕快樂、新年進步，卡上印有香港十大著名標記，問大家搵唔搵到。收到聖誕卡嘅民建聯劉國勳喺... 詳情
相關新聞
