【Emily】區議員張國昌 家庭原因退出民主黨
[2021.03.26] 發表
【明報專訊】東區區議員張國昌退出民主黨，佢回覆查詢時話，係因為家庭原因退黨，被問係咪同《港區國安法》或區議員宣誓有關，佢話冇補充。張國昌退黨後，民主黨目前有87個區議員。民主黨主席羅健熙就話，喺過去兩星期收到張嘅退黨通知，暫時未聽聞仲有其他人退黨；至於有關區議員宣誓，阿熙話下月黨內會正式討論，然後再向大家交代。
東區區議員網頁上，張國昌已喺「所屬政治聯繫」一項，刪去民主黨字眼。張國昌2014年經補選晉身區議會，時任當區區議員民主黨梁淑楨因嚴重中風，缺席會議導致席位出缺。張國昌喺2015年及2019年嘅區議會選舉中都成功連任。目前民主黨喺東區區議會尚佔3個席位，包括蘇逸恒、周卓奇，以及因民主派初選案被還押嘅趙家賢。
更多港聞
相關新聞
