【Emily】劉勇威被指霸副主席位 大埔區議員尋人
[2021.12.31] 發表
【明報專訊】大埔區議員姚鈞豪喺「大埔TAI PO」專頁開post，話有啲問題要請教大家意見，佢話2019年有17個準區議員開會，大家講好新一屆區議會主席同副主席會兩年一屆，第一個任期係2020年至2021年底，即係今日。姚鈞豪不點名話當時嘅副主席劉勇威，至今無回覆係咪會尊重呢個協議。姚鈞豪話自己後生唔係好識處理，問大家可唔可以教佢，喺職場上點處理呢個情况。
幾個前任同現任大埔區議員都喺帖文留言「尋人」，何偉霖嘅網上工作室留言話劉勇威「失咗蹤」，唔覆信息、唔覆電話、唔開會，仲點名話劉勇威要今日辭任副主席，「請問劉議員肯交代未？」已辭任區議員嘅胡耀昌就留言話，可能好多人覺得黑暗時代槍口要一致對外，但佢覺得「誠信」更重要，反問「守信與否都交代聲，真係咁難？」同樣已辭任嘅陳振哲，呼籲有人見到劉勇威就通知佢回覆，「佢已讀不回呀」。
Emily噚日試過打畀劉勇威，電話由辦事處職員接聽，職員都話唔知劉勇威去咗邊，只係知佢有嘢出去做，唔返議辦。
更多港聞
【Emily】初選案被捕 還押近一年 吳政亨總結2021年：顛覆
【明報專訊】年初因民主派「35+初選案」被捕嘅吳政亨（Gordon，圖），轉眼還押近一年，佢朋友見前日宣布停運嘅「立場新聞」早排有個「用一個... 詳情
相關新聞
