林煥光籲學生回校 「望成有能力憤怒鳥」

林煥光籲學生回校「望成有能力憤怒鳥」

[2014.11.10] 發表

【明報專訊】曾經提出「雞蛋與高牆」嘅日本作家村上春樹日前勉勵香港學生，行政會議召集人林煥光噚日亦主動「回應」對方，話自己都想同學生講，希望佢哋盡快返回學校，以知識孵化自己，「等大家可以成為有能力嘅Angry Bird(憤怒鳥)」，將來可以催生社會轉變。唔知林煥光係咪都有玩開Angry Birds呢個遊戲，所以要用呢個比喻呢？

回應村上：學生應以知識孵化自己

林煥光噚日回應有關學生要上京見領導人一事時，話自己觀點都公開講過，唔想再煩，但就特別話佢留意到村上春樹遙遠支持同學，佢話自己都想同同學講，希望佢哋盡快返學校，然後就有Angry Bird呢個比喻喇。

黃之鋒﹕留意綠豬下場係點

學民思潮黃之鋒喺facebook回應話，林煥光竟然將香港人同政府比喻為雀仔同綠色豬呢種有你無我嘅「敵我矛盾」，實在太可恥，又話對方懶潮咁用手機遊戲做比喻，不如同佢講吓呢個遊戲點玩，即係喺Angry Bird撞擊下，綠色豬嘅下場係點，相信對方應該要收回言論。

學聯秘書長周永康亦話，唔明點解林煥光會用遊戲去比喻佔領運動，周永康話Angry Bird嘅精髓係要擲中目標，而學生?家爭取普選嘅目標亦都好清晰。