毅行者戴黃絲帶撐黃傘：街上留守辛苦過毅行

[2014.11.15] 發表

【明報專訊】一年一度嘅「樂施毅行者2014」噚日喺西貢北潭涌舉行，今年共有1300隊共約5200人參加，比舊年4672人多出約一成，參加者需要喺48小時內完成100公里山路路程，包括翻越20幾座高山。有參加者佩戴黃絲帶、手持黃雨傘或喺背囊貼上「我要真普選」標語，以表達對真普選嘅訴求。噚晚大約8時25分，由外籍人士組成嘅Team Columbia S1率先衝刺，用咗11小時56分便完成100公里路程，較第二隊衝刺隊伍快咗超個半粒鐘。而第二隊衝刺嘅係港人隊伍。

有參加者起步時舉起「我要真普選」標語，佢話希望將信息傳開去，完成賽事後亦會返佔領區繼續支援學生。有參加者將寫有「我要真普選」嘅黃色小雨傘撐開固定喺背囊上面，喺人群中特別搶眼。亦有參賽隊伍全體穿上印有獅子山同黃傘圖案嘅制服。有大學生喺背囊貼咗張「我要真普選」標語，佢話，今年第二次參加毅行者，毅行者同雨傘革命精神一樣，都需要付出毅力去達成目標，佔領者喺街上留守咗40幾日，仲辛苦過毅行者喎。