【明報專訊】現時大家拎住手機可以隨時隨地煲劇睇片，唔使坐喺電視機前，但尼爾森調查就話，逾90%受訪家庭仍選擇實時收看電視節目。不過，80後消費者群組(年齡25至34歲)，就係最唔專注實時睇電視節目嘅年齡群組，實時收看比率88％，而年過50嘅一輩坐定定睇電視比率最高，達到93%。 為本港業界提供電視觀眾收視調查服務(HKTAM)嘅尼爾森，喺3月中至4月底做調查，發現電視機喺香港市場嘅滲透率高達99%，高於美國同類調查嘅96%，當中近五分之二香港家庭(36%)擁有至少兩部電視。調查又發現，約有71%家庭擁有數碼電視(Digital TV)，14%擁有智能電視(Smart TV)/4K電視。 調查又發現，約77%本港家庭擁有至少一部桌面或筆記簿型電腦，而44%則有平板電腦。個人電腦仍然係觀看網上節目時最受歡迎嘅「第二屏幕」(48%)，同時，用智能手機上網睇片亦日益流行，從2013年嘅29%急升至2014年嘅40%。
|
| |
| |
