同卿姐做節目多火花 撐CY連任？ 李國章咦咦哦哦

同卿姐做節目多火花撐CY連任？李國章咦咦哦哦

[2016.05.27] 發表

【明報專訊】民主黨主席劉慧卿主持網上節目《議會內外》原本已經完結，但噚日請到行會成員、港大校委會主席李國章做嘉賓，卿姐仲自己掏腰包租錄影廠做訪問，兩個不時爆金句嘅人相遇，當然火花四濺。

同卿姐傾學術自由

話說卿姐問到李國章點捍衛院校自主同學術自由，李國章強調自己一定會捍衛，重提當年做中大校長時處理「路祥安事件」做得啱，做咗港大校委後又問過港大10個校院院長，所有人都話學術自由無問題，如有邊個覺得學術自由受打擊，「你出聲，我同你處理」。卿姐隨即反問：「如果畀李國章打擊，又可以搵邊個呢？係咪搵我呢？」卿姐又話李國章個花名叫沙皇，反映唔聽意見，李國章就笑住話「沙皇畀人斬咗頭」。

李國章之後接受傳媒訪問，繼續再同卿姐擦出火花。有記者話卿姐表明唔支持特首梁振英連任，李國章未聽完問題就插嘴話，係咪卿姐支持CY連任？搞到卿姐立即澄清當然唔支持啦，李國章就話卿姐係要自己選特首，所以唔支持CY，又話卿姐選乜都得。卿姐就話自己選咗7次直選都贏，直接叫李國章唔好講廢話，快啲畀記者繼續問。

李國章就未有回應係咪支持CY連任，只係話CY定其他人都無表態話選，所以到時先再考慮啦。